فرحان

أزيكم أزيكم أنا جي أخدم عندكم

كلمه بسمعها كتير و بتضايقني
أصل الناس بيقولوها عشان يوصفوني كتير مع إني مش خدام

سيبكم من الموضوع ده هنرجعله بعدين بس دلوقتي أعرفكم بنفسي الأول :

أنا فرحان أول عامل في البلد دي و أكتر واحد عاش أيامها مو شاف لياليها
الناس بتقولي عم فرحان كإحترام ليا و لمنزلتي العظيمه في البلد دي

-----------------

حكايتي مع البلد دي طويييييله أوي هبتديها النهارده و هاكملها في المرات القادمه

من حوالي 15 سنه كنت بدور على شغل يليق بمقامي و في الوقت ده سمعت عن بلد لسه ظاهره أسمها FCI
فقلت يا واد يا فرحان روح شوفلك شغلانه هناك يمكن تلاقي حاجه تليق بمقامك
و لما رحت أحترموني أوي و عرضوا عليا أكتر من منصب و قالولي أختار أنا
و بما أني عندي خبرات في التعامل و كفاءه عاليه و قدره على تحمل الصعاب (وعشان الفلوس طبعا) أخترت أحسن مكان في البلد و اللي في المستقبل هيبقى فيه ناس كتير

المكان ده هيبقى فيه التكنولوجيا و الأدوات المتطوره في البلد و هيسموها المبنى الجديد عشان هي للأسف هتبقى صغيره فتحسها كده مبنى واحد

و طبعا اللي كان بيأهلني أكتر إني شخص مثقف جدا "خصوصا بعد ما اأخدت تدريب مكثف يخليني أعرف أجي أكتب هنا"

-------------

أقولكم بقى أنا ليه هنا :
من كام شهر دخل عندي واحد من سكان بلدنا و قاللي أنا عاوزك تيجي تكتب عن البلد يا عم فرحان
فأنا رديت : ليه كده يا أبني
فقالي : أصل أنا شايفك من الشخصيات اللي أتأثرت جامد بالبلد دي و عاشت فيها أكتر من أى شخص تاني
فقلت :(طبعا انا اللي شايل المكان ده فوق دماغي) طب و أنا هستفيد أيه من الموضوع ده
فقالي : هتستفيد كتير أولا هتوضح وجهه نظرك للناس و تفهمهم أن أنتا مثقف و مش أى حد و كمان هتبقى مشهور
قلت : طب أنا هكتب عن أيه أصلا ؟؟ (لما نشوف أخرتها)
قالي : عن اللي بتشوفه في المبنى الجديد سواء اللي بيعجبك أو مش بيعجبك و كمان هتقول وجهة نظرك في حاجات كتير سواء اللي هما بيعملوها أو اللي أنتا بتعملها و الناس فاكرينها غلط
قلت : مممممم (ده كله غلط في غلط)
قالي : ده كمان ممكن تتكلم براحتك عن رؤساء البلد و محدش هيعملك حاجه
قلت :(يا حلاوه بس أكتب أزاي) انا موافق بس أنا معرفش أكتب جامد
قالي : عندك حل من الاتنين يأما تحكيلي و أنا هكتب أو تتعلم الكتابه كويس و تيجي تكتب
قلت : خلاص أنا هتعلم الكتابه و هأكتب (ليكتب كلام أنا مقولتوش ولا حاجه) .. بس أحيانا برضه هاقولك و انتا اللي تكتب(أهو تشتغل بلقمتك)
قالي : و أنا موافق ، أنا هديك فرصه تتعلم كويس و هاجيلك تاني

* الكلام اللي بين الأقواس كنت أنا بقوله في سري

و على كده جالي أمبارح و قاللى أتعلمت قلتله جدا
قالي خلاص تكتب من بكره قلتله ماشي

و النهارده كتبت ليكوا أول مواضيعي وحكيت بدايتي مع البلد العريقه و إزاي وصلت ليها و من المره الجايه نكمل الحكايه و نفتح مواضيع نفسي أتكلم فيها من زمان


و على رأي المفتش كرومبو :] صحبي الروح بالروح
ابقو قابلوني في الحلقه الجيه

سلااااااااام

الأول

اهلا اهلا اهلا
أزيكوا ؟
أسمي رائد و هكون أول شخصيه تقابلوها من مطحونين بلاد ال FCI
اشكر طبعا الكاتب انه قرر يعرفني عليكم و يعرفكم عليا قبل كل أصحابي
بس هو مش بإيده للأسف .... القدر أجبره على كده ، نظرا لطبيعتي المتميزه

طبعا انتوا عاوزين تعرفوا ايه اللي في طبيعتي مميز يخلي الكاتب يبتدي بيا و يخليني أول شخصيه
هاقولكم :
الحكايه أبتدت يوم الجمعه 1-1-1988
كنت أنا و أخويا عمالين نتخانق مين فينا يتولد الأول وبعد خناقه عنيفه جدا كانت النتيجه اني أتولدت الأول.
و نظرا لأني أتولدت الأول قرر والدي يمسميني رائد.
بس للأسف، الأسم ده أثر عليا بقيت حياتي و ولد عندي مشكله خطيره،
المشكله : أن انا من ساعتها و انا بطلع الأول في كل حاجه.
بيني و بينكم هي دي مش مشكلتي أنا،
بس دي مشكلة ناس كتير من اللي يعرفوني.
المهم ان نتيجه للموضوع ده كنت الأول في حضانه و بعد كده في ابتدائي و إعدادي و حتى الثانويه العامه.
وكمان عرفت كمية أصحاب بسبب اني الأول دايما (مصلحه يعني) وخسرت أصحاب كتير بسبب أني الأول برضه (غيره يعني).

الاهم ان انا بعد الثانويه العامه قررت اني اسافر في رحله طويله من اللي بيقولوا عليها رحلة اللي يروح و ميرجعش
قرار أسافر إلى بلاد ال FCI
وخلال مقابلاتي القادمه معاكوا هفتح يومياتي اللي كنت بكتبها من ساعة ماسافرت و هابتدي احكيلكم منها.


بس عشان نعرف نتعامل مع بعض من النهارده عاوز انكوا تنادوني بإسمي المفضل "رار"
بصراحه أصحابي هما اللي اطلقوا عليا الأسم ده .. بس أنا بحبه جدا
طبعا هتقولوا ايه الاسم الغريب ده بس هو الاسم ليه سببين :
أولا : دلع لأسمي الاصلي "رائد"
ثانيا: rar ده extension للملفات المضغوطه
أصل هم بيقولوا أن أنا عامل زي الملف المضغوط علشان عندي معلومات كتير جدا مضغوطه جوايا.

مش هحكيلكم دلوقتي عن أصحابي، خليها مفاجأه لما يتكلموا عن نفسهم
بس متنسوش تبقوا تسألوهم عن رأيهم فيا !!

يلا كفايه عليكم كده
و أشوفكم قريب في يوم تاني من يوميات مطحون في بلاد ال FCI

سلااااااااااااام

* الموضوع نشر سابقا

مقدمه

السلام عليكم،

أحب أعرفكم بنفسي
أنا مطحون بيه فرد من أفراد شعب FCI العظيم
واحد من الناس اللي نفسهم إنهم يحولوا بلدهم لجنه
و نفسهم أن بلدهم دي تكون أحسن و أرقى البلاد على وجه الأرض

و للسبب ده قررت إني أتبنى فكرة صديقي "محمد رفعت" و أعمل مدونه أسميها " مطحون في بلاد ال FCI "
و لأكتر من سبب أفضل إن الناس تعرفني بإسم مطحون و إن شخصيتي تفضل مش معروفه
يمكن عشان اتكلم بحريه أكتر أو عشان أنا معقد نفسيا ...


الطبيعي أن كل مؤسسه في الدنيا لها قوانين و لها أهداف
و علشان نبتدي صح هقول القوانين :
1- هنبدأ بتعريف أكتر من شخصيه "شخصيات شبه خياليه" هدف الشخصيات دي أن هي تمثل أشخاص حقيقيه
2- مش المقصود بأشخاص حقيقيه إن مثلا الشخصيه X تمثل فرد بعينه و لكن بتمثل فئه من الاشخاص ممكن يكون كل واحد منهم عنده صفه واحده من صفات الشخصيه دي
3- الشخصيات دي هتعيش أحداث بتمر بيها في بلدها FCI و هتبقى بتتكلم بأسلوب شبه ساخر عن شوية عيوب و مزايا في بلدهم
4- كمان أحيانا الشخصيات هتقدم حلول لمشاكل في بلدها و يمكن كمان تعرف تطبق الحلول دي .
5- الكتابه هتكون باللغه العربيه السهله في أغلب الاوقات و ده علشان أسهل في القراءه و أسرع و عشان كمان دي لغتي الأساسيه
6- أي حد عنده فكره و عاوز يتكلم عنها عن طريق شخصيه من الشخصيات يقدر يبعتلي و لو الفكره فعلا مهمه يقدر يكتبها
7- هيكون فيه أكتر من كاتب و هنحاول نبقى فريق بيحاول يكمل بعضه و يطرح مشاكل الكليه و نحاول نحلها
8- الأسلوب يفضل أنه يكون ساخر وبعيد عن الكلام technical المعقد D:
9- أي حد إيجابي نفسه يتكلم في مشاكلنا و يقدر يكتب عنها هكون سعيد جدا لو بعتلي و طلب أنه يشاركنا في فريق المدونه

كتير القوانين دي أنا عارف بس زي ما قلت عشان ننجح لازم يبقى فيه قوانين و أهداف
و الهدف أننا : نطرح مشاكل FCI و نحاول نحلها حتى لو في خيالنا و نتعلم الإيجابيه و التعبير عن الرأى بحريه
يمكن تكون دي خطوه في تحسين our FCI و حل مشاكلها


يارب نقدر نحقق ولو هدف من الأهداف دي عن طريق الblog ده

و نشوفكم مع أول الشخصيات المطحونه

إمضاء
مطحون بيه